¡Por fin la lluz del día!, orbaya, upo la persiana metálica que rincha como quexándose y sofítola na colgadiella, la embarcadora baxa les pontes y sube la barrera, arreblago per debaxo. Llibertá.
El orpín destiñe los cascos, ye trentaiún, hai gayola y folixa nel ambiente, glayíos, ixuxus, chancies, mañana nun se trabaya, ye fiesta. Los pasos entainen, ya nun son tan curtíos como cuando van en direición contraria. Fai frío, muncho cutu o quiciabes non, pero’l contraste col sudu, col mugor asina me lo fai sintir. Nun m’importa.
Dexo’l Fenzy nel so furacu, escolingo la chapa. Pongo’l focu a cargar, prendese dos vegaes como chisgándome un güeyu, como despidiéndose, escolingo la chapa. Merco un agua na llampistería pa baxar el polvu del gargüelu, el llitru y mediu que baxé nun foi abondo. Empobinome pa la casa baños, prendo un pitu, tuso, carpio, surnio, ferviello, cuspio. Cuspio derrota, deceición, mocos prietos… rabies. Escolíngome dafechu.
Empeno’l cascu nel colgaderu, en sintíu lliteral, sí, pero tamién metafóricu, como los bosiadores ecolinguen los guantes o los fubolistes les botes al retirase. El mio retiru ye forciau, políticu, ¿ambiental?
El agua puerco amiya piernes abaxo faciendo un champán prietu alredor de les chancles. El mio compañeru frotame’l llombu con mas fuercia de la avezada. Ye igual, reláxame, yo ensin decatame faigo lo mesmo cola espalda del «vagón» d’alantre nesi tren improvisau que se forma tolos díes nes duches. Arrincar el carbón del pelleyu entemecío col aceite del martiellu de barrenar, cuesta cuasi tanto como arrincalo abaxo. Fino la esfriega delantre’l espeyu dexando la piel nidia, rellumante, la raya los güeyos queda sollerte, como pintada col meyor llapiceru eyeliner del mercau. Llistu.
Camudome n’ayén, despacín, saborguiando’l intre, talantando en finca-y el diente al pitu caleya con patatinos, que de xuru tendrá iguau mio má pa la cena, como toles nuechevieyes. Préstame a esgaya., les renumbrances aloyeres, afayadices, danme un respiru.
Piesllo la taquiella, toi cansu, galdíu, siéntome abangau nel bancu, nun quiero colar, güei non, miro al rodiu mio, pero miro colos güeyos zarraos, como pa guardalo nel caxón d’eses alcordances que nun quies que se pierdan nel desiertu‘l escaezu. Naide diz nada, ya nun hai niciu de la gayola, de les chancies, solo ruxerux, solo un tudeburde atristayau. Xingo los costazos, resígnome.
Morrió’l día, l’añu, el romanticismu, la llucha, la brenga, el puxu, la resistencia, les fuelgues, los dos sieglos d’hestoria, el futuru…Asturies.
Esti añu portémonos endemasiao bien, fuimos mui blandios. Si mio güelu o cualesquier d’aquellos homes de los d’enantes, de mirada seca, de boina calada, de madreñes ensin ferrar, de llámpara al costín, llevantaren la tiesta… Queden seis díes pa que vengan los reis y como a tolos neños bonos, nun mos van a trayer el mineral pol que naguamos; ¡CARBÓN!.
